Presiden Russell M. Nelson I Leftemap Tingting blong Mas Gohed blong Lukaotgud taem Jos i Lukluk i Go Moa long Medel blong Wol Sik KOVID-19

President Russell M. Nelson

Ol dia fren blong mi mo yufala we mi wok wetem. Long ol manis ia blong KOVID-19 wol sik ia, taem we wol ia i fesem ol jalenj olsem i neva bin gat bifo, mi glad tumas long bigfala namba blong eksampol blong fet, strong paoa long tingting, mo lav olsem hemia blong Kraes we mi bin luk.  Tangkyu blong givim seves mo stap lavlavem yufala olsem we Sevya i wantem yumi mekem.

Yumi talem tangkyu tumas from daereksen, we i bin help, we ol lida blong gavman, helt, mo sosaeti oli bin givim blong kipim yumi stap sef.  Mo bae yumi gohed blong prea mo stap lukaotgud we lukaotgud long yumi.  Sefti mo gudlaef blong yufala, oltaem bae i faswan long ol wari blong mifala.

Taem yumi lukaot mo muv i go long wan moa nomol wei blong laef, ol lida blong Jos bae oli gohed mo folemap infomesen mo skelem se wetaem bae yumi save mit bakegen long ol mitinghaos mo tempol blong yumi long ol defren ples.  Yumi save se ol odinens blong tabu tempol, yumi nidim blong mekem olgeta.  Oli gat mining long taem we i no save finis.

Bambae mifala i talemaot klia, step folem step, wetaem mo weaples ol kam tugeta, mo ol nara aktiviti blong Jos bae oli save stat bakegen.  Ol niu niufala jenis long misinari seves oli stap gohed naoia.

Be naoia i stap, yumi stap glad long pis ia we i saen aot long Lod Jisas Kraes.   Pis ia bae i gohed blong fulumap yumi wetem hop mo glad.  Papa blong yumi long Heven mo Pikinini blong Hem we Hem i Lavem Tumas, Tufala i lavem yumi, mo Tufala i save gud yumi mo bambae Tufala i blesem wanwan long yumi.

Mi lavem yufala, ol dia brata mo sista blong mi, mo talem stret long yufala se i gat ol gudfala dei we oli stap kam yet.  !Komitmen blong yumi blong stap folem Lod, i no gat en!