Kemuni na noqu itokani kei na wekaqu raraba, ena gauna ni veivula oqo ni mate ni vuravura raraba na COVID-19, ni sa mai vakaluluqataki o vuravura ena ibolebole sega ni namaki, au mai qoroya tu kina na ivakaraitaki tawawili rawa ni vakabauta, yaloqaqa, kei na loloma sa Vakarisito au a raica rawa. Vinaka vakalevu na nomuni veiqaravi ka veilomani tiko vakai kemuni me vaka ga e gadreva na iVakabula meda na cakava.
Eda sa vakavinavinakata na veidusimaki veivukei era sa vakarautaka na matanitu, tabana ni bula, kei ira na iliuliu raraba mera taqomaki keda kina. Eda sa tomana tikoga kina noda masumasu ka gole yani ena noda qaqarauni sara vakavinaka. Na nomuni tiko taqomaki kei na bula vinaka sa neitou kauwai cecere duadua.
Ni da toso yani ki liu ena yalomatua ki na ivakarau raraba ni bula e vinaka cake, era na tomana tiko na iliuliu ni Lotu na nodra tauri itukutuku ka dikeva na sala totolo meda laki soqoni vata tale ena noda veivalenilotu kei na valetabu ena noda dui vanua. Keitou kila ni cakacaka vakalotu ni valetabu e dodonu me vakayacori. Era sa inaki bibi ni bula tawamudu.
Keitou na veitaratara tiko yani vakamatata ena veikalawa yadua baleta na gauna kei na vanua ena tekivu tale kina na soqoni vata kei na itaviqaravi tale eso ni Lotu. Sa caka tiko ena gauna oqo na veisau baleta na veiqaravi ni kaulotu.
Ena gauna oqo, eda na rekitaka na vakacegu e ramase mai vua na Turaga o Jisu Karisito. Ena vakasinaiti keda tikoga ena inuinui kei na reki. Na Tamada Vakalomalagi kei na Luvena Lomani o Jisu Karisito e rau lomani keda, ka rau wanonovi keda tiko, ka rau na vakalougatataki keda vakayadua.
Au lomani kemuni, na taciqu kei na ganequ lomani, kau vakadeitaka vei kemuni ni sa roro tiko mai na veisiga totoka. Na noda yalayala meda muria na Turaga sa tawayalani!